Ni NOEL ABUEL
Tinitiyak ni Senate President Francis “Chiz” Escudero na hahanapan nito ng solusyunan ang problema sa parking at iba pang isyung kinakaharap ng mga kawani ng Senado, gayundin ang mga bumisita sa kanilang kasalukuyang lokasyon, habang nakabinbin ang paglipat sa New Senate Building sa Taguig City.
Sa flag-raising ceremony noong Lunes, binigyan-diin ni Escudero ang kahalagahan ng pagtitiyak ng sapat na parking facility na matagal nang problema sa lokasyon ng Senado sa GSIS building sa Pasay City.
Para mapagaan ang problema ito, idinetalye ni Escudero ang ginagawang habang para maisaayos ang parking spaces sa GSIS building, na magsisilbi bilang isang modelo sa hinaharap ng plano sa New Senate Building.
“Dito, anong ginagawa natin? Sinisikap nating maayos ang parking ng empleyado’t bisita ng Senado para sa mas maayos na kapaligiran. Kinuha na natin, hiningi natin, at hiniram natin ang lupa ng DPWH sa gawing kaliwa ko para makapagbigay ng humigit kumulang 300 na espasyo para sa parking,” pahayag nito.
Maliban sa paggamit ng lote ng DPWH, sinabi ni Escudero na patuloy ang negosasyon sa Social Security System para magamit ang bahagi ng lote bilang kanilang parking space sa likod ng GSIS building.
“Sa kabuuan, kaya nating makapagbigay ng humigi’t kumulang 1,400 slots para sa mga nagmomotor at may sasakyan,” sambit ni Escudero.
“Kaayusan kaugnay sa simpleng paniniwala at prinsipyo ko na maayos dapat ang lugar na pinagtatrabahuan, kapag malinis at masinop madalas o palagi magiging malinis, masinop at maayos din ang pagtrato natin sa ating kapaligiran na maaapektuhan din ang ating trabaho,” paliwanag nito.
Sa mga nagdaang linggo, inikot ni Escudero ang bawat tanggapan sa kasalukuyang gusali ng Senado para mas maintindihan ang pangangailangan at alalahanin ng halos 2,000 opisyal at kawani ng institusyon.
Sa kanyang talumpati sa flag raising ceremony, idinetalye rin ni Escudero ang nag-udyok sa kanyang pagbisita sa bawat tanggapan ng Senado at binigyan-diin ang kahalagahan na pakinggan ang concern o alalahanin sa bibig mismo ng mga kawani, gayundin ang kanilang ninanais at mga pangangailangan, na aniya’y napakahalaga para sa maayos na serbisyo ng Senado sa bansa.
“Sa aking pakiramdam at pakiwari, trabaho kong alamin ang bawat opisina gayundin ang kondisyon ng bawat opisyal at empleyado upang marinig at mapakinggan din ang inyong mga concern, ang inyong mga ninanais, ang inyong mga mithiin, pangarap at pangangailangan kaugnay ng trabahong marapat at dapat nating gampanan sa ating paninilbihan sa bayan at sa sambayanan,” diin ni Escudero.
Ang mga inisyatibo ni Escudero ay pagpapakita ng kanyang ‘hands-on leadership style’ at ng kanyang dedikasyon para masigurong ang operasyon ng Senado ay nakahanay sa pangangailangan at inaasahan ng kanyang mga staff, at sa huli’y mapahusay ang abilidad ng institusyon na epektibong mapagsilbihan ang publiko.
OnlineBalita news 