Ni NOEL ABUEL
Nanawagan si Senador Win Gatchalian sa Department of Energy (DOE) na maglatag ng mga contingency measures para tiyakin ang pagkakaroon ng sapat na supply ng coal at maiwasan ang posibleng pagtaas ng presyo nito matapos ipagbawal ng Indonesia ang pag-export nito ng coal ngayong buwan.
Ayon sa senador, ang hakbang na ito ay bunsod ng mababang suplay ng coal para sa power plants na kung hindi maagapan ay maaaring humantong sa malawakang blackout sa buong Indonesia.
Nagpahayag ng pagkabahala ang Senate Energy Committee chairperson sa kadahilanan na ang Indonesia ang pinakamalaking pinagkukunan ng Pilipinas ng supply ng coal kung saan noong 2020, 57.17% na power generation para sa buong bansa ay nagmula sa coal.
“Dapat maging bahagi ng contingency measures ay ang pagtitiyak na sinusunod ng coal-fired power plants ang alituntunin na nagtatakda sa kanila na magkaroon ng 30 araw na minimum inventory requirement (MIR),” sabi ni Gatchalian.
“Dapat isaalang-alang din ng gobyerno ang pagkuha ng mga panibagong suppliers na makakatugon sa ating mga pangangailangan lalo na sa mga susunod na linggo kung kailan posibleng bumaba ang stock ng bansa na magmumula sa Indonesia. At dahil dyan ay maaari itong magresulta sa pagtaas ng presyo ng coal,” dagdag pa nito.
Batay sa datos ng DOE noong Oktubre 2021, nasa 96.88% ang nai-supply na coal ng Indonesia sa sa Pilipinas, 1.82% ay inangkat mula sa Australia, 0.35% naman ay nagmula sa Vietnam, at ang natitirang 0.94% ay binili mula sa iba pang mga bansa.
Sa kabuuang 42.476 million metric tons ng coal na ginamit noong 2020, 69.51% ay imported samantalang 30.49% naman ay nanggaling sa local sources.
“Magsilbi rin sanang wake-up call ang pangyayaring ito. Dapat pag-isipan na ng mabuti ng gobyerno at magpasya sa pagbabawas ng paggamit natin ng coal sa pamamagitan ng pagtataguyod ng iba pang mapagkukunan ng enerhiya,” sabi ni Gatchalian.
OnlineBalita news 