Ni NOEL ABUEL
Pasado na sa Senado ang panukalang batas na naglalayong magkaroon ng Metropolitan Davao Development Authority (MDDA) na makakatulong para sa pag-unlad ng Metropolitan Davao.
Unanimous ang naging boto ng mga senador sa House Bill No. (HBN) 8930 kung saan ang MDDA ay may hurisdiksyon sa buong Davao City, sa mga syudad ng Panabo, Tagum, Island Garden City of Samal (IGACoS) sa Davao del Norte; Lungsod ng Digos sa Davao del Sur; Lungsod ng Mati sa Davao Oriental; at sa mga munisipalidad ng Sta. Cruz, Hagonoy, Padada, Malalag at Sulop sa Davao del Sur; Carmen sa Davao del Norte, Maco sa Davao de Oro, at Malita at Sta. Maria sa Davao Occidental.
Pinasalamatan naman ni Senador Francis “Tol” Tolentino, chairman ng Senate Committee on Local Government at sponsor ng nasabing panukala, ang mga kapwa nito senador sa pagtanggap sa nais nitong metropolitanization sa nasabing mga lalawigan partikular sa Southern Philippines.
“The establishment of MDDA will institutionalize the rapid urbanization of Davao region through strategic and viable reforms primarily towards regional cooperation and economic growth. By agglomerating major cities and municipalities of the region, MDDA will further liberalize LGUs (local government units) within its jurisdiction from their dependence upon the national government and promote a sustained and all-inclusive decentralization in the region,” paliwanag ni Tolentino.
Nakapaloob sa panukala na ang MDDA services ay kabilang ang development planning, transport management, solid waste disposal and management, flood control and sewerage management, urban renewal, zoning, land use planning and shelter services; health and sanitation, urban protection, and pollution control; at public safety.
Bubuuin ang Metropolitan Davao Development Council, bilang governing board and policy making body, ng isang chairperson ng Regional Development Council, Region XI; governors ng mga probinsya ng Davao Oriental, Davao de Oro, Davao del Norte, Davao del Sur, at Davao Occidental; ang mga alkalde ng Davao, Mati, Tagum, Digos, IGACoS, at Panabo; gayundin ang mga municipal mayors ng Carmen, Sta. Cruz, Hagonoy, Padada, Malalag, Sulop, Maco, Malita at Sta. Maria na magsisilbing ex officio.
Ia-appoint ang chairperson ng council ng Pangulo ng Pilipinas mula sa piling nominees na isinumite ng council at magsisilbi sa loob ng tatlong taon.
Nakapaloob din sa panukalang batas ang pagtatayo ng Metropolitan Davao Police District, na siyang operational control sa lahat ng police offices na nasa hurisdiksyon ng MDDA.
OnlineBalita news 