Solon sa DoTr at LTFRB: Madaliin ang pagpapalabas ng fuel subsidy

Ni NOEL ABUEL

Kinalampag ng House Committee on Transportation ang Department of Transportation (DoTr) at ang Land Transportation Franchising and Regulatory Board (LTFRB) na pabilisin ang pagpoproseso ng fuel subsidy para sa mga public utility vehicle (PUV) drivers.

Sa pagdinig ng nasabing komite, sinabi ni Samar Rep. Edgar Mary Sarmiento, na dapat madaliin ng  DoTr at ng LTFRB ang pagpapalabas at pamamahagi ng P5 bilyong fuel subsidy sa tinatayang 377,400 PUV drivers sa ilalim ng Pantawid Pasada Program (PPP).

Ayon pa kay Sarmiento, chairman ng komite, nagpatawag ito ng emergency hearing upang talakayin ang patuloy na pagtaas ng presyo ng produktong petrolyo at para makakuha ng mga update mula sa kinauukulang ahensya ng pamahalan sa estado ng pagpapalabas ng fuel subsidies at pagbibigay ng tulong sa mga transport groups bilang tugon sa tumataas na halaga ng gasolina.

Sa pagdinig, inirereklamo ng mga PUV drivers na hanggang sa kasalukuyan ay hindi pa rin natatanggap ng mga ito ang P6,500 fuel subsidy na iniutos ni Pangulong Rodrigo Duterte upang masawata ang epekto ng tumataas na presyo ng langis.

Ayon naman sa Land Bank of the Philippines (LBP) nakapagpalabas na ito ng P569 milyong fuel subsidy para sa 87,500 PUV drivers.

“As Committee on Transportation Chairman, it is our duty to aid our transport sector who immediately bears the burden of high prices of petroleum products. We recommended the immediate release of fuel subsidies to our PUV drivers, the continuation of the service contracting program, and the suspension or lowering government fees for the aviation and maritime sectors during the joint committee meeting last March 7, 2022,” ayon pa kay Sarmiento.

“We understand how hard the fuel price increases have been for our PUV drivers, which is why we are doing everything in our power to expedite the release of the fuel subsidies for our drivers,” dagdag pa nito.

May mga reklamo rin aniya na ilang PUV operators ang hindi nagdedeklara ang resibo ng fuel subsidy sa kanilang mga tsuper dahilan upang personal na nanawagan si Sarmiento sa LTFRB na ilabas ang database ng kanilang PPP beneficiaries.

Hiniling din ng komite sa Department of Trade and Industry (DTI) na isumite ang pinal na listahan sa LTFRB ng mga delivery service riders na kuwalipikado para tumanggap ng fuel subsidy.

Pinasalamatan naman ni Sarmiento ang DoTr, LTFRB, DTI, at LBP sa kanilang pag-apruba sa kanyang panukala na gumamit ng cash cards at e-wallets upang matiyak na direktang matatanggap ng mga tsuper ang kanilang fuel subsidy.