Oras ng pagboto ng mga OFWs palawigin – Sen. Imee

Ni NOEL ABUEL

Umapela si Senador Imee Marcos na palawigin ang oras ng pagboto ng mga overseas Filipino workers (OFWs) sa mga embahada at konsulada ng Pilipinas.

Ang panawagan ay ginawa ni Marcos, chairman ng Senate committee on electoral reforms and people’s participation, sa posibleng maulit ang mga napaulat na aberya sa unang araw ng botohan ng OFWs sa Hong Kong, United States, Italy, at New Zealand sa iba pang mga bansa na may malaking populasyon ng OFWs.

“’Wag na nating hintayin na kung kailan ‘last-minute’ o konting oras na lang ang natitira saka matataranta na maghanap ng remedyo. Libu-libong mga OFWs ang mawawalan ng karapatan na makalahok o makaboto,” diin ni Marcos.

“Pinakamabilis na solusyon ang pagpapalawig ng oras ng botohan sa ating mga embahada at mga konsulada, habang inaasikaso pa ng Commission on Elections (Comelec) ang iba pang mga problema sa logistics o mga gamit sa pag-aayos ng karagdagang mga ‘voting precinct’,” dagdag ng senadora.

Tinukoy ni Marcos ang kawalan ng pare-parehong mga oras ng botohan sa abroad kung saan ang iba ay natatapos sa kalagitnaan ng hapon o ang iba ay pinatatagal hanggang gabi.

Ang mahabang pila, pagkaantala ng mga ‘election paraphernalia,’ at hindi pa natatanggap na mga mail-in ballots aniya ang mga dahilan kung kaya’t nahaharang o hindi nakakaboto ang mga OFW.

Maraming reklamong nakararating sa tanggapan ni Marcos mula sa Saudi Arabia at United Kingdom na hindi alam ng mga OFW kung saan boboto o hindi nakapag-rehistro dahil tapos na ang rehistrasyon.

“Kailangan kompyutin ng Comelec at Department of Foreign Affairs (DFA) paano masigurong makaboto ang mga OFW sa iba’t bang mga lugar araw-araw at sa loob ng isang buwang  inilaan para sa botohan sa abroad,” ani Marcos.

“Hindi pa naman huli ang lahat o may oras pa para mabilisang maipabatid sa mga OFW kung saang voting precinct sila nakatalagang bumoto,” giit pa ng senadora.