Romualdez nakatitiyak na sa House speakership

23 bagong miyembro sumanib sa Lakas-CMD

Ni NOEL ABUEL

Nakatitiyak nang maging susunod na House Speaker sa pagbubukas ng 19^th Congress si House Majority Leader at Leyte 1st District Rep. Martin G. Romualdez kasunod na rin ng patuloy na pagdami ng bilang ng halos lahat ng political groups na suportahan ang huli bilang pinuno ng Kamara.

Nabatid na huling sumanib sa Lakas-CMD ang 23 mga kongresista na dagdag sa 50 House members na nag-endorso kay Romualdez bilang magiging House Speaker sa susunod na Kongreso.

Ang iba pang political party-endorsers ni Romualdez ay kinabibilangan ng PDP-Laban, National Unity Party (NUP), Nationalist People’s Coalition (NPC), Nacionalista Party (NP), Hugpong ng Pagbabago (HNP), Party-List Coalition Foundation, Inc., at iba pang independents, neophyte o first-term na kongresista.

“We are elated that our colleagues chose to be with us in Lakas-CMD. We look forward to having a fruitful engagement with them and sharing the values and advocacies we have followed and pursued as one of the biggest political parties in the country,” sabi ni Romualdez na isang abogado at pangulo ng Philippine Constitution Association (Philconsa).

Sinabi pa ni Romualdez na ang desisyon ng mga mambabatas na sumabi sa Lakas-CMD ay magpapalakas sa legislative agenda ng susunod na administrasyon ni President-elect Ferdinand “Bongbong” Marcos Jr.

Kabilang sa mga bagong miyembro ng Lakas-CMD ay sina Quezon Rep. David “Jayjay” C. Suarez; Quezon City Rep. Patrick Michael “PM” D. Vargas; Caloocan City Rep. Dean Asistio; Isabela Rep. Faustino “Inno” Dy V;  Biñan City, Laguna Rep. Marlyn “Len” B. Alonte; Mandaue City Rep. Emmarie “Lolypop” M. Ouano-Dizon; Davao Oriental Rep. Cheeno D. Almario; Surigao del Norte Rep. Francisco Jose “Bingo” F. Matugas II; Sulu Rep. Samier A. Tan; Camiguin Rep. Jurdin Jesus “JJ” M. Romualdo; Maguindanao  Rep. Dimple Mastura; Southern Leyte  Rep. Christopherson Yap; Manila Rep. Irwin Tieng; Quirino Rep. Midy Cua; Manila Rep. Ernix Dionisio; Cebu Rep. Edsel Galeos; Batangas Rep. Jinky Bitrics Luistro; Oriental Mindoro Arnan C. Panaligan; Zambales Rep. Doris E. Maniquiz; Isabela  Rep. Joseph Tan; Isabela Rep. Faustino Michael Carlos T. Dy III; Cagayan Rep. Jojo Lara at Sarangani Rep. Steve Solon.

Sinabi ni Zamboanga Sibugay Rep. Wilter “Sharky” Palma II, ang deputy secretary general ng Lakas-CMD, inaasahan nito na ang mga miyembro ng Kamara ay magiging produktibo lalo na at tumulong ang mga ito sa UniTeam tandem ni Marcos at ng running mate nitong si Vice President-elect Sara Duterte.

Ayon pa kay Palma, kinilala ni Marcos ang naging kontribusyon ng Lakas-CMD sa nakaraang kampanya para manalo ito.

 “Of course how can I talk about this (victory) without talking about ang ginawa ng tulong ng Lakas, at s’yempre headed ng ating majority floor leader, Congressman Martin, who looks set to be the next Speaker,” sabi nito.