NI NERIO AGUAS
Naaresto ng mga operatiba ng Bureau of Immigration (BI) ang walong foreign nationals na pinaghihinalaang miyembro West African big-time illegal drugs syndicate sa magkakahiwalay na lugar sa bansa.
Ayon kay BI Commissioner Jaime Morente isinagawa ng fugitive search unit (FSU) ang operasyon sa tulong ng mga tauhan ng National Bureau of Investigation Special Action Unit (NBI-SAU) para madakip ang nasabing mga dayuhan sa lungsod ng Las Piñas at Makati.
Armado ng mission orders na inilabas ni Morente, sinalakay ng BI at NBI ang isang bahay sa lungsod ng Las Piñas City kung saan nadakip ang dalawang Yemeni nationals na nakilalang si Ayesh Hazem Faiz Kadaf at kapatid nitong si Ayesh Hamzah Faiz Kadaf.
Sinabi ni BI-FSU Chief Rendel Ryan Sy na kasama rin naaresto sina Mohamoud Mouhoumed Mohamed, isang Djibouti national na nakuhanan ng illegal na droga.
Sa hiwalay namang operasyon sa Gen. Luna St., Poblacion, Makati City, nahuli ang Sudanese nationals na sina Mohamed Alfaith Mohamed Saeed Osman, Eltayeb Ahmed Subahi Faris at ang Angolan nationals na sina Ciel Do Carmo Miguel Domingos, na nakuhanan din ng illegal drugs.
Kasama rin sa nadakip ang Sri Lankan na si Mohamed Silmy Sahabdeen at ang Kyrgyztani national na si Anara Ruslanova na nahulihan din ng di nabatid na dami ng illegal drugs.
Sinabi ni Morente na sasailalim sa deportation proceedings dahil sa pagiging undesirable aliens ang nasabing mga dayuhan dahil sa pagkakasangkot sa illegal drugs.
“However, they will to be criminally charged and prosecuted in court and, if convicted, they will have to first serve their sentences before we can deport them,” sabi ng BI chief.
Pinuri naman ni Morente ang mga tauhan ng BI-FSU sa matagumpay na operasyon para malansag ang mga dayuhan na sangkot sa bawal na gamot.
“We will not tolerate any foreign national destroying our communities by peddling illegal drugs. We are working closely with other government agencies to ensure that these criminals are deported and blacklisted from our country,” sabi nito.
Kasalukuyang nakakulong sa BI warden facility sa Camp Bagong Diwa, Taguig City ang walong dayuhan habang hinihintay ang pagharap sa kasong kriminal laban sa mga ito bago ipatapon pabalik ng kanilang mga bansa.
OnlineBalita news 