NI NERIO AGUAS
Magdaragdag ng tauhan ang Bureau of Immigration (BI) sa Ninoy Aquino International Airport (NAIA) upang matiyak na nababantayan nang husto ang nasabing paliparan mula sa mga dumating at umaalis na lokal at dayuhang turista sa bansa.
Ayon kay BI Commissioner Jaime Morente, 63 newly-hired immigration personnel ang nakatakdang ilagay sa primary inspection sa NAIA para mabantayan ang mga international travelers sa susunod na buwan.
Sinabi ni Morente na ang 63 immigration officers ay kabilang sa 195 newly-hired immigration personnel na sumailalim sa pagsasanay ng immigration laws, rules and procedures sa Philippine Immigration Academy sa Clark, Pampanga.
“We are confident that the deployment of these new immigration inspectors will help address the perennial problem of lack of manpower of BI personnel,”ayon pa kay Morente.
Sinabi naman ni Atty. Carlos Capulong, BI acting port operations chief, na ang nasabing mga bagong immigration personnel ay malaking tulong lalo na at inaasahan na ang pagdagsa ng mga pasaherong umaalis at dumarating sa bansa kada araw.
Paliwanag nito, mula sa average daily arrival na 4,000 hanggang 5,000 pasahero, umakyat ito ng 17,000 hanggang 20,000 pasahero kada araw simula nang buksan ang Philippine borders sa mga foreign tourists.
“We foresee a further uptick in our passenger arrivals and departures in the coming weeks as the travel and tourism industry continues to rebound and recover from the negative impact of the pandemic,” sabi ni Capulong.
OnlineBalita news 