1K magsasaka sa North Cotabato makikinabang sa irrigation facilities ng NIA at DPWH

NI NERIO AGUAS

Ipinagmalaki ng Department of Public Works and Highways (DPWH) na maaari nang pakinabangan ng mahigit sa 1,000 magsasaka ang itinayong irrigation facilities ng National Irrigation Administration (NIA) sa Lower Malitubog Service Area (LMSA).

                Pinangunahan ni DPWH Undersecretary Emil K. Sadain, chief Implementer ng Build Build Build Program ang partial turnover ng nasabing irrigation facilities para sa LMSA sa ilalim ng Malitubog-Maridagao Irrigation Project Stage II (MMIP II) sa NIA Region XII na may kabuuang 1,642 ektarya.

Ang ceremonial  turnover ng irrigation facilities ay sinaksihan nina Sadain at NIA Deputy Administrator for Engineering and Operations C’zar M. Sulaik kasama sina NIA Region XII Regional Manager Diosdado A. Rosales; MMIP-II Acting Project Manager Reynaldo M. Sarigumba; Bangsamoro Transition Authority (BTA) Member of Parliament Ali O. Salik na kinatawan si Bangsamoro Autonomous Region in Muslim Mindanao (BARMM) Chief Minister Ahod Balawag Ebrahim; Political Affairs Assistant Nicanor T. Nanlabi ng tanggapan ni North Cotabato 1st District Rep. Joselito Sacdalan; Ray Domingo ng Department of Agriculture (DA), Nasser Gayagay na tanggapan ni Pikit Mayor Sumulong K. Sultan, Commission on Audit (COA) Auditor Romeo A. Casupang at iba pang opisyales ng NIA.

Ayon kay Sadain, ang ₱5.4-billion na Malitubog-Maridagao Irrigation Project ay 85 porsiyentong tapos at kabilang ito sa 119 infrastructure flagship projects ng pamahalaan para makatulong sa food self-sufficiency program ng nasabing lalawigan.

Sakop ng nasabing pasilidad ang mga  irrigation areas (IA) sa Pikit, North Cotabato: Gli-Gli Lat H & LatH2 IA Inc. na mayroong 110 farmer beneficiaries (FB); Bulao Bulo IA Inc. na mayroong 159 FB; Tigpo IA Inc. na mayroong 150 FB; Makauyag Lat H IA Inc. na mayroong 201 FB; Maglib IA Inc. na mayroong 250 FB; at sa Sitio Galigayan IA Inc. na may 229  benepisyaryo.

Sinabi pa ng DPWH official na ang Malitubog-Maridagao Irrigation Project Stage II ay magda-divert ng irrigation water mula Maridagao River na gagamitin ang pasilidad ng MMIP I na makakatulong sa maserbisyuhann ang 9,528 hectares ng agricultural land ng Aleosan at Pikit sa Cotabato at Pagalungan at Datu Montawal sa Maguindanao.