Ni NOEL ABUEL
Inihain sa Kamara ang panukalang batas na magbibigay ng proteksyon sa mga senior citizens laban sa pang-aabuso.
Sa House Bill 109 na inihain ni Manila Rep. Ernesto Dionisio Jr. nais nitong bigyan ng proteksyon at kinakailangang tulong ang mga nakatatanda at personal na kaligtasan at seguridad.
“This is also to prevent the recurrence of violent acts committed against them,” aniya.
Ikinalungkot ni Dionisio ang kawalan o kawalan ng tiyak o naaayong batas sa pag-iwas at proteksyon ng mga matatanda mula sa naturang pang-aabuso.
“Enshrined in our Constitution is the duty of the State to design programs of social security for its elderly members,” sabi nito.
Binanggit ni Dionisio ang isang pag-aaral noong 2004 na isinagawa ni Dr. Edna E.A. Co, isang propesor at dating dean ng University of the Philippines-National College of Public Administration and Governance (UP-NCPAG), kung saan 40 porsiyento ng mga nakatatandang respondents ay may personal na karanasan sa karahasan.
Ang pag-aaral na may titulong, “The Case of the Philippine Older Persons: Finding a Place in the Human Rights Domain” ay nagpapakita na ang pinakakaraniwang gumagawa ng karahasan sa mga senior citizen ay ang kanilang mga anak at iba pang miyembro ng pamilya.
Ipinakita rin sa nasabing pag-aaral na kadalasang uri ng pang-aabuso sa mga nakatatanda ay sa pamamagitan ng verbal abuse.
Sa panukalang batas, ang karahasan laban sa mga matatanda ay nahahati sa limang pangkalahatang kategorya, katulad ng: 1) pisikal na pang-aabuso; 2) sekswal na pang-aabuso; 3) sikolohikal o emosyonal na pang-aabuso; 4) materyal o pinansyal na pang-aabuso; at 5) kapabayaan.
Sa ilalim ng panukalang batas, ang karahasan laban sa mga matatanda ay ituturing na isang pampublikong pagkakasala at sinumang mamamayan na may personal na kaalaman sa mga pangyayari na kinasasangkutan ng paggawa ng krimen ay maaaring magsampa ng reklamo laban sa gumagawa ng pang-aabuso.
OnlineBalita news 