NI RHENZ SALONGA
Suportado ni Pangulong Ferdinand “Bongbong” Marcos Jr. ang panukalang pag-aralan ang kasalukuyang education curriculum sa bansa upang matulungan ang mga estudyante na magkaroon ng kasanayan na hinahanap ng iba’t ibang industriya at masolusyunan ang job mismatch.
Sa inilabas na kalatas ni Press Secretary Trixie Cruz-Angeles, naging laman ng pinakahuling Cabinet meeting ang usapin sa abilidad, kakayahan ng mga manggagawa at ang mga nagtatapos sa pag-aaral.
“Among the suggestions to address these standing issues include a reform of the current curriculum since the rise of automation has posed a threat to many jobs,” sabi ni Angeles.
Iniutos ni Marcos sa kanyang mga cabinet members na tumulong sa pagpapahusay ng basic education skills and knowledge upang maihanda ang mga estudyante sa mas mataas na antas ng pag-aaral.
“That’s exactly what is happening. That is why we have to look at the curriculum as well. Not only of Technical Education and Skills Development Authority (TESDA), but also even our diploma courses,” ani Marcos.
Sa kanyang PowerPoint presentation, sinabi naman ni Department of Trade and Industry (DTI) Secretary Alfredo Pascual ang pangangailangan na pag-aralan ang kasalukuyang curriculum partikular ang basic at tertiary education.
Idinagdag pa ni Pascual na nakahanda ang DTI na tumulong sa mga unibersidad para gumawa ng micro-credentialing systems upang makatugon sa fast-changing technological advancements.
“We’re developing or helping universities develop this system of micro-credentialing because technology is changing very fast. There is a need for workers to update themselves, to reskill or upskill,” ani Pascual.
Inihalimbawa pa nito ang kaso ng National University of Singapore na nakapokus ngunit maigsing kurso sa teknolohiya at pinarangalan ang mga estudyante ng micro-credential na kahalintulad sa diploma sa maigsing kurso.
Suhestiyon pa ng kalihim ng DTI ang pangangailangan ng bansa na magpadala ng mga Filipino teachers sa ibang bansa para sumailalim sa pagsasanay.
“Vietnam, for example, sends teachers to the United States and Europe for advanced studies,” aniya pa.
Samantala, upang masolusyunan aniya ang job mismatch, sinabi ni Pascual na dapat magtulungan ang DTI, Department of Education (DepEd), Commission on Higher Education (CHED), at TESDA.
“We will also collaborate with the said entities or authorities, the skills development, reskilling and upskilling of Philippine workforce through our own Philippine Skills Framework,” ayon pa kay Pascual.
OnlineBalita news 