Insentibo sa mga employers na mag-eempleyo ng mga dating adik ipinanukala

Ni NOEL ABUEL

Inihain sa Senado ang panukalang batas na magbibigay ng insentibo sa mga kumpanyang kukuha ng serbisyo ng mga dati at gumaling nang drug dependents.

Sa Senate Bill No. 2276 na ipinanukala ni Senador Jinggoy Estrada, ang mga kumpanyang magbibigay ng magandang trabaho para sa mga reformed drug users at magbibigay insentibo sa mga ito.

“Sa pagbibigay ng mga insentibo sa mga establisyemento na kukuha ng mga rehabilitated drug dependents na sumailalim at nakapagtapos sa mga programang technical-vocational education and training (TVET) na partikular na idinesenyo para sa kanila, mabibigyan natin ng suporta ang kanilang reintegrasyon sa lipunan,” sabi ni Estrada.

Sa ilalim ng SBN 2276, iminumungkahi ni Estrada, na kilalang labor advocate, ang pagkakaroon ng kolaborasyon sa pagitan ng Technical Education and Skills Development Authority (TESDA) at Department of Labor and Employment (DOLE) para makabuo ng TVET programa para sa mga rehabilitated drug dependents.

Ang TVET at mga programang pangkabuhayan ay tutuon sa pagbibigay sa mga reformed drug users ng kakayahang makipagkumpitensya na maaaring maging daan upang makahanap sila ng matatag na trabaho o makapagtaguyod sa pagkakaroon ng sariling negosyo.

Layon ng panukalang batas na itatag ang mga programa at matiyak ang paglalaan ng pondo para patuloy ang pagpapatupad sa mga ito.

Sinabi ni Estrada na mula pa noong 2016, nagbibigay na ng pagsasanay at livelihood scholarship sa mga dating drug dependents ang TESDA at noong taong 2021, nasa 94 porsiyento o 8,200 mula sa kabuuang 8,700 na mga dating gumagamit ng iligal na droga ang nakapagtapos ng iba’t ibang kurso mula sa nasabing ahensya.

“Ito ay sapat na patunay ng kahandaan ng mga dating drug dependents na makapagbagong-buhay. Mahalagang mapanatili ang suporta na ibinibigay sa kanila at palawakin ang saklaw nito upang isama ang skills training at productivity enhancement na maghahanda sa kanila na maging self-reliant at kwalipikado para sa makabuluhang trabaho,” sabi ng chairperson ng Senate Committee on Labor, Employment, and Human Resources Development.

“Mapapabuti nito hindi lamang ang pinansiyal na kalagayan ng kanilang pamilya kundi makakatulong pa sa pag-unlad ng bansa,” dagdag pa ni Estrada.