Maglaan ng pondo para sa mga magsasakang apektado ng El Niño — solon

Ni NOEL ABUEL

Hinimok ni Deputy Speaker at Las Piñas Rep. Camille Villar ang gobyerno na maglaan ng pondo na maaaring gamitin ng mga magsasaka na apektado ng El Niño bilang tulong sa layuning sugpuin ang posibleng matinding epekto ng masamang panahon na nauugnay dito.

“It is important to discuss this now and prepare for contingency measures especially for our small-scale farmers,” sabi ni Villar.

Aniya, sa nakaraang El Niño episode sa bansa noong 2019, tinatayang P8 bilyon ang pinsala sa sektor ng agrikultura.

Una nang idineklara ng Philippine Atmospheric Geophysical and Astronomical Services Administration (PAGASA) na opisyal nang pumasok sa Pilipinas ang El Niño matapos na magpakita ito ng mga palatandaan ng paglakas sa mga darating na buwan.

Nagbabala ang mga eksperto na ang El Niño ay malamang na humantong sa isang bagong pagtaas sa temperatura at mag-trigger ng mas matinding sama ng panahon at klima, na ang mga pananim ang makakaranas ng epekto nito na maaaring makaapekto sa seguridad ng pagkain sa mga rehiyon.

Sa mga nakaraang El Niño phenomenon sa Pilipinas, nagkaroon ng matinding tagtuyot na nakaapekto sa sektor ng agrikultura at nagdulot ng pinsala sa iba pang mahahalagang sektor sa bilyun-bilyong piso.  

Noong panahon din ng El Niño, nanalasa rin ang malalakas na bagyo sa bansa.

Sa kasalukuyan ay hindi bababa sa apat na probinsya sa Northern Luzon ang nakaranas na ng dry spells o dry conditions, at maaaring makaapekto sa mahigit 30 probinsya sa mga darating na buwan hanggang sa susunod na taon.  

Ipinahiwatig ng mga state weather forecasters na mayroong malaking pagkakataon na ito ay magiging isang “malakas” na El Niño sa pagtatapos ng taon.

“We need to be better prepared and ready to extend assistance to farmers whose livelihoods are at risk so that they can have some sort of safety net or social protection either in the form of loans, direct cash assistance or cash-for-work,” sabi pa ni Villar.

Nauna nang inihain ni Villar ang House Resolution 1024 para tingnan ang mga posibleng interbensyon ng gobyerno sa iba’t ibang sektor sa gitna ng pagbabalik ng El Niño.