IACAT nagsagawa ng inspeksyon sa BI sa NAIA

Ni NERIO AGUAS

Nagsagawa ng inspeksyon ang Inter-Agency Council Against Trafficking (IACAT) sa Ninoy Aquino International Airport (NAIA) terminal 3 upang tignan ang operasyon ng Bureau of Immigration (BI).

Ang inspeksyon, na isinagawa ni Department of Justice Undersecretary at IACAT in-charge Nicholas Felix Ty, ay naglalayong suriin ang mga pamamaraan sa mga departure formalities bilang bahagi ng regular na pagsisiyasat ng inter-agency.

Sa isinagawang inspeksyon, kinumpirma ng IACAT na ang BI ay nagpapatupad ng parehong mga pamamaraan tulad ng ipinatutupad nito sa nakalipas na panahon.

Magugunitang sa unang bahagi ng linggo, inilabas ng IACAT ang binagong mga alituntunin sa mga pormalidad ng pag-alis upang mabawasan ang mga kinakailangan para sa mga papaalis na Pilipino.

Muling iginiit ng BI na ang mga bagong alituntunin ay walang karagdagang kinakailangan para sa mga papaalis na turista.

“In the updated guidelines, regular tourists are only required a passport valid for at least 6 months, a valid visa if visa required, a boarding pass, and a confirmed round trip ticket,” sabi ni BI Commissioner Norman Tansingco.

Binigyan-diin nito na ang mga panuntunan ay naglilista ng mga kinakailangan para sa iba pang kategorya ng mga papaalis na Pilipino, gayundin ang mga maaaring sumailalim sa pangalawang inspeksyon.

“As in the past, only Filipinos that are subjected to secondary inspection due to red flags may be required to show additional supporting documents, which are now specified in the guidelines,” sabi ni Tansingco.

“The new guidelines issued by the IACAT would ensure that immigration officers look at specific requirements and not require frivolous documents which could later be a cause for complaints,” dagdag pa nito.

Nauna nang binigyan-diin ng IACAT ang kahalagahan ng mga alituntunin sa pagprotekta sa mga papaalis na Pilipino mula sa human trafficking at illegal recruitment.

Ang mga alituntunin sa mga pormalidad ng pag-alis ay inilagay na mula noong 2012, at kalaunan ay binago noong 2015.

“There is no new policy for departing tourists being implemented by the BI. Departing tourists need not worry,” ayon pa dito.