Mandatory insurance coverage sa powerline workers isinulong sa Senado

Ni NOEL ABUEL

Inihain ni Senador Chiz Escudero ang panukalang batas na naglalayong magbigay ng mandatory insurance coverage at iba pang benepisyo para sa lahat ng lineworkers sa power utility sector.

Sa Senate Bill 2303, sinabi ni Escudero na titiyakin ng panukala na mapoprotektahan ang kapakanan ng libu-libong lineworkers gayundin ng kanilang mga pamilya.

“The continuous and reliable supply of electricity—crucial in sustaining our economic growth and maintaining our way of life—rests on the hands of lineworkers who construct, install, maintain, rehabilitate and repair our electrical transmission and distribution systems,” ani Escudero.

“While they perform both critical and dangerous work, a number of them do so bereft of any form of coverage against death, accidents, illness, and other fortuitous events that could be sustained in the line of duty,” dagdag pa nito.

Dahil dito, ipinunto ng senador, ang SB 2303 ay naglalayong iutos sa mga pribadong distribution utilities, electric cooperatives at transmission o grid operators na magbigay ng insurance coverage sa lahat ng kani-kanilang lineworkers at palawigin ang iba pang mga karapatan tulad ng retirement at disability benefits, death and burial assistance, at mga reimbursement sa medikal na gastos, at iba pa.

“It is hoped that the provision of insurance coverage and other benefits would ensure that our lineworkers, as well as their families, are protected from the risks and perils of their chosen occupation,” ayon pa kay Escudero

Tinukoy ng SB 2303 ang “lineworkers” bilang “mga tao, kabilang ang mga crew, driver at helper, na direktang responsable para sa pagtatayo, pag-install, pagpapanatili, muling pagtatayo, rehabilitasyon at pagkumpuni ng mga electrical transmission at distribution system, kabilang ang mga underground cable, electrical substation at iba pang nauugnay na mga pasilidad ng kuryente.”p

Iminungkahi na ang lahat ng mga lineworkers ay may karapatan sa mga benepisyo sa accident o disability insurance benefits.

Ang pinakamababang insurance coverage ay nasa P200,000; P400,000; at P600,000 para sa small, medium at large electric cooperatives, ayon sa pagkakasunod.

Samantala, ang mga lineworkers sa extra-large at mega large electric cooperatives ay magkakaroon ng minimum insurance coverage na P800,000 at P1,000,000.

At sa mga private distribution utilities, ang minimum insurance coverage ay P1,500,000; at sa transmission o grid operators, ang minimum insurance coverage ay P2,000,000.00.