Ni NOEL ABUEL
Pinabulaanan ni ACT-CIS party-list Rep. Erwin Tulfo na may plano para i-impeach si Vice President Sara Duterte kaugnay ng kontrobersyal na P125 milyong confidential fund na naubos sa loob ng 11 araw.
Ayon kay Tulfo minabuti nitong itanong sa liderato ng Kamara partikular kina Speaker Ferdinand Martin G. Romualdez, at House Committee on Accounts chairperson Elizaldy Co at iba pa kung mayroong katotohanan ang isyu.
“This morning, I reached out to leaders, including Cong. Zaldy (Co) and the Speaker, to address rumors circulating in Congress. However, there is no substance to these discussions; no such thing has been deliberated among party leaders or the House leadership,” sabi ni Tulfo sa panayam ng media.
Ang komite ni Co ang nagdesisyon na ilipat ang P650 milyong confidential fund ng Office of the Vice President at Department of Education sa mga security forces sa gitna ng tensyon sa West Philippine Sea.
Nauna rito ay naglabas ng pahayag si Deputy Minority Leader at ACT Teachers party-list Rep. France Castro na mayroon umanong mga mambabatas na nag-uusap-usap tungkol sa posibleng impeachment laban kay Vice President Duterte.
Nilinaw naman ni Castro na ang mga usapang ito ay hindi naman sineseryoso at wala umanong solidong hakbang laban sa ikalawang pangulo.
“I’m unsure where Cong. Castro got this information, and upon inquiry, the leadership was equally surprised. I confirmed with my superiors, and there’s no such discussion,” sabi ni Tulfo.
Ipinunto pa nito na sa kasalukuyan, walang masasabing impeachable offense na gawa ang Bise Presidente.
Iginiit ni Tulfo na dapat ay may kaakibat na matibay na ebidensya ang paghahain ng impeachment complaint.
“Perhaps, in the future, with additional facts, details may emerge, altering the situation. However, currently, there’s no substance, and it requires further review. As per the leadership, there’s no discussion or plan for impeachment when we return on Monday,” giit ni Tulfo
Itinanggi rin ni Tulfo na may kampihan sa Kamara laban sa bise-presidente at pabor kay Speaker Romualdez.
“The unity is focused on moving the country forward, following the directive of President Marcos to stand together,” ani Tulfo.
Sinabi naman ni House Majority Leader Mannix Dalipe na fake news ang sabi-sabing i-impeach si VP Duterte.
Ayon kay Dalipe walang basehan ang naturang usapan at panira lamang ng pagkakaisang pampulitika ng bansa.
Naniniwala si Dalipe na ang naturang tsismis ay isa lamang pagtatangka para paghiwalayin sina VP Duterte at Romualdez.
Sumagot din si Dalipe kaugnay ng mga tsismis na tatakbo si Romualdez sa pagkapangulo sa 2028.
Sinabi ni Dalipe na sa kasalukuyan ay abala ang Speaker sa pagtaguyod ng mga panukalang batas na makabubuti sa mga Pilipino at wala pa umanong desisyon kaugnay ng pagtakbo nito sa susunod na presidential elections.
Iginiit din ni Dalipe na walang merito ang sinasabi na pinapahina ni Romualdez si VP Duterte dahil potensyal niya itong kalaban sa 2028 elections.
Aniya patuloy na inirerespeto ni Romualdez si VP Duterte at ang paninira ay hindi umano taktika ng lider ng Kamara.
Ipinunto rin nito na hindi basta-basta ang paghahain ng impeachment complaint sa Kongreso dahil nangangailangan ito ng matibay na ebidensya at makatwirang dahilan alinsunod sa proseso ng Konstitusyon.
Iginiit din ni Dalipe na walang dapat na ikabahala si VP Duterte kung wala naman itong maling ginawa.
OnlineBalita news 