Ni NOEL ABUEL
Isinusulong sa Mababang Kapulungan ng Kongreso ang pagbibigay ng maternity cash benefits sa mga nagtatrabahong ina sa halagang katumbas ng 22 beses ng umiiral na minimum wage rate sa rehiyon kung saan sila nakatira.
Sinabi ni Bicol Saro party list Rep. Brian Raymund Yamsuan, ang maternity cash grant ay nakapaloob sa ilalim ng inihain nitong House Bill 10070 kung saan nilalayon nito na makinabang ang mga babaeng manggagawa na hindi miyembro ng Social Security System (SSS), regular man o boluntaryo.
Kabilang dito ang mga freelancer, mga self-employed, home-based workers, mga nagtatrabaho sa ilalim ng ‘no-work, no-pay’ arrangement, at iba pa.
“Working in the informal sector leaves women without any form of social benefits. They have to continue to work while nurturing themselves back to health and providing for their newborn infant and their family because they are deprived of the most fundamental social protection—maternity benefits,” sabi ni Yamsuan.
“The eligibility for maternity leave and benefits under our laws is limited to those who are SSS members, thus excluding a considerable number of Filipino women workers who are non-members. This measure aims to address this gap,” dagdag pa nito.
Batay sa pagtataya, nasa mahigit 6.6 milyong kababaihang manggagawa sa informal economy ang makikinabang sa naturang po panukala.
Layon din nito na amiyendahan ang ilang probisyon ng Republic Act 11210 o ang “Expanded Maternity Leave Law.”
Sa ilalim ng panukalang batas, ang mga babaeng manggagawa na hindi boluntaryo o regular na miyembro ng SSS ay makakatanggap, sa pamamagitan ng Department of Social Welfare and Development (DSWD) ng isang beses na direktang maternity cash benefit sa bawat paghahatid na katumbas ng umiiral na minimum wage rate sa kanilang rehiyon ng paninirahan ‘multiplied by 22 days’.
Sa sandaling maging batas, ang isang informal sector worker na nakatira sa Metro Manila kung saan ang umiiral na minimum wage rate ay P610 ay tatanggap ng P13,420 mula sa DSWD pagkatapos manganak.
Ang pondo ay magmumula sa makokolekta sa excise taxes sa sweetened beverages, alcohol, tobacco products, at vapor products at maaaring dagdagan sa ilalim ng General Appropriations Act.
“More than alleviating the hardships and worries of working mothers-to-be, the provision of maternity protection has been linked to a number of positive outcomes for the mother, for her child, for the economy, and for communities and society at large,” sabi ni Yamsuan.
“Access to the benefit increases female participation in productivity, promoting workforce equality and ultimately, economic growth,” dagdag nito.
OnlineBalita news 