Lee sa DA: Makipagtulungan sa IRRI

Ni NOEL ABUEL

Hinimok ni AGRI party list Rep. Wilbert T. Lee ang Department of Agriculture (DA) na makipagtulungan sa International Rice Research Institute (IRRI) para mapabilis ang pagpapalabas ng ultra-low glycemic index (GI) at sari-saring uri ng bigas na mayaman sa protina sa mga Pilipinong magsasaka.

Sinabi ni Lee na malaki ang maitutulong ng pag-mainstream ng produksyon ng iba’t ibang uri ng bigas sa pagbabawas ng mga kaso ng diabetes mellitus sa bansa.

“Hindi naman po kaila sa atin na ang Pilipinas ay isa sa mga nangungunang consumers ng bigas sa buong mundo. At dahil tila permanenteng parte na ng ating pagkain ang kanin, hindi maikakaila ang koneksyon nito sa dami ng may diabetes sa bansa,” ayon sa kongresista.

Batay sa pinakahuling datos ng International Diabetes Federation kung saan miyembro ang Philippine College of Endocrinology, Diabetes and Metabolism, sa kabuuang populasyon ng nasa hustong gulang na 66,754,400 sa Pilipinas noong 2021, mayroong kabuuang 4,303,899 na kaso ng diabetes ang naitala, katumbas ng 6.44 porsiyento.

Dagdag pa dito, noong 2023, ang mga namamatay sa Pilipinas dahil sa diabetes mellitus ay naitala sa 14,416 na kaso, o 6.2 porsiyentong bahagi, kaya ito ang pang-apat na nangungunang sanhi ng pagkamatay sa bansa.

Nilalayon ng IRRI na ipakilala ang ultra-low GI, high protein rice variety sa 2025.

Sinabi ng research institute na ang multi-location trial para dito ay nasimulan na sa mahigit 10 probinsya sa buong bansa.

Ang glycemic index ay isang ranggo ng mga pagkaing naglalaman ng carbohydrates batay sa kung gaano kabagal o kabilis ang mga ito na natutunaw at nagpapataas ng mga antas ng glucose sa dugo, na may purong asukal na may markang 100.

Sinabi ng IRRI na inaasahan nito na mas maraming magsasaka ng palay ang maglilinang ng iba’t ibang ito sa sandaling matukoy ng mga pagsubok ang target na pamilihan.

Ayon sa IRRI scientists, ang presyo ng ultra-low GI, high protein rice ay magiging pareho sa karaniwang bigas na makukuha sa mga pamilihan.

“Kapag mas may access at nagawa pa nating mas abot-kaya sa Pilipino ang ganitong klase ng bigas, mas marami ang matutulungan nating makaiwas o mabawasan ang alalahanin sa mga chronic disease tulad ng diabetes at kaugnay nitong mga sakit,” sabi ni Lee.

“Dahil sinasabi rin ng mga eksperto na mas mabilis tayong makakaramdam ng pagkabusog sa bigas na ito, mas kaunti rin ang ikokonsumo natin. Bawas na sa pangamba sa sakit, bawas pa sa gastos. Winner Tayo Lahat sa bagong uri at mas healthy na bigas na ito,” dagdag pa nito.