Ika-5 pagdinig sa RBH No. 6 ipagpapatuloy ng Senado

Ni NOEL ABUEL

Ipagpapatuloy ng Senado sa Huwebes, Mayo 9, 2024, ang pagdinig nito sa mga mungkahing pag-amiyenda sa economic provisions ng 1987 Constitution.

Ito ang magiging ikalimang pagdinig ng subcommittee ng Senado sa mga pagbabago sa Konstitusyon at revision of codes na pinamumunuan ni Senador Sonny Angara sa Resolution of Both Houses No. 6 na nagpapanukalang amiyendahan ang tatlong probisyon ng Konstitusyon na makitungo sa pagbubukas ng mga public utilities, edukasyon at advertising sa dayuhang pagmamay-ari.

Ang ikalimang pagdinig ay tututuon sa industriya ng advertising kung saan ang Konstitusyon ay nagsasaad na “is impressed with public interest, and shall be regulated by law for the protection of consumers and the promotion of the general welfare.”

Dahil dito, ang dayuhang equity sa advertising ay limitado sa 30 porsiyento.

“It is common knowledge that the Philippines is among the most restrictive countries when it comes to foreign ownership in particular sectors. We have heard the arguments for and against the opening up of public utilities and higher education in our previous hearings and now we will listen to the opinions of the stakeholders of the advertising sector,” pahayag ni Angara.

Kabilang sa mga resource persons na inimbitahan sa pagdinig sa Huwebes ay ang mga kinatawan ng mga pangunahing ahensya ng advertising; mga kumpanya ng telebisyon, radyo at cable; mga organisasyon ng print media; at ang mga ahensya ng gobyerno na may kinalaman sa regulasyon ng industriya at pamumuhunan sa pangkalahatan.

Nakatakda ring magsagawa ng mga pampublikong konsultasyon ang komite sa labas ng Metro Manila sa mga susunod na linggo.

“As suggested by Senate President Migz Zubiri, the committee will hold hearings in Baguio for the Luzon region, Cebu for the Visayas region and Cagayan de Oro for Mindanao. The intention here is to raise awareness of as many people as possible on the proposals to amend the Charter,” ani Angara.

“Whatever happens with the current efforts to amend the economic provisions of the Constitution, it is good that we are debating this now in public and more Filipinos will also be discussing this among themselves,” dagdag pa nito.

Para sa regional meetings, sasangguni ang komite sa mga kaugnay na ahensya ng lokal na pamahalaan; mga panrehiyong tanggapan ng mga ahensya ng pambansang pamahalaan; mga opisyal ng lokal na pamahalaan kabilang ang mga gobernador, alkalde at kongresista, mga pinuno ng industriya/negosyo; at ang mga pinuno ng mga institusyong pang-edukasyon.