Kamara iimbestigahan ang drug war ng Duterte administration

Ni NOEL ABUEL

Nagkatakda ang House Committee on Human Rights na iimbestigahan sa susunod na linggo ang sinasabing extrajudicial killings (EJK) na may kaugnayan sa kontrobersyal na war on drugs ng panahon ng administrasyong ni dating Pangulong Rodrigo Roa Duterte.

Inihayag ni Manila 6th District Rep. Bienvenido “Benny” Abante Jr., chairman ng nasabing komite, sa isang press conference na ang unang pagdinig, na nakatakda sa Mayo 22, ay magsasama ng magkakaibang grupo tulad ng mga kaanak ng mga biktima ng drug war, pulis, at mga opisyal ng gabinete mula sa administrasyong Duterte.

Sinabi pa ni Abante na ang imbestigasyon ay naglalayong hanapin ang katotohanan at mangalap ng komprehensibong impormasyon sa umano’y malawakang paglabag sa karapatang pantao na nauugnay sa paglaban sa illegal na droga, na may layunin na bumuo ng batas para palakasin ang karapatang pantao sa bansa.

“Ang tanong siguro ng iba, why are we conducting an inquiry into the deaths of alleged drug addicts or drug dealers? First, we must begin with the principle that each life is valuable and that each life lost is a profound tragedy. Second, we must point out that those who lost their lives, like every Filipino, are protected by the rights granted by the Constitution, one of which is due process,” paliwanag ni Abante.

“Alleged drug users and dealers po sila, ‘di po sila na-convict because these alleged EJK victims were silenced, they were denied their rights. Now, it is our responsibility to the victims of alleged [EJK] and their families to seek the truth,” dagdag pa nito.

Nilinaw ni Abante na hindi intensyon ng komite na magpasa ng hatol, isang puntong sigundahan ni panel vice-chairman Lanao del Sur 1st District Rep. Zia Alonto Adiong.

“It’s not actually the intention of the committee to prove whether the drug campaign in the previous administration was bogus or not,” ayon kay Adiong.

Sinabi nito na ang layunin ng komite ay alamin kung sa bansang ito, ay pinaiiral pa rin ang due process.

“Kung malakas pa po ba talaga ang ating prosesong legal pagdating doon sa mga issues na concerning you know, in this particular case, ‘yung mga drug related incidents and that would also trickle down to the concern of whether these legal processes were exercised or not in the previous administration would also fall on under the context of preserving human rights,” pahayag pa ni Adiong.

Lumalabas sa datos ng gobyerno na mahigit 6,200 drug suspects ang namatay sa anti-narcotics sting operations mula nang maupo si Duterte noong Hunyo 2016 hanggang Nobyembre 2021.