Ni MJ SULLIVAN
Tuluyan nang pumasok sa Philippine Area of Responsibility (PAR) ang kauna-unahang sama ng panahon o low pressure area na inaasahang magiging bagyo sa darating na weekend.
Ayon sa Philippine Atmospheric, Geophysical and Astronomical Services Administration (PAGASA), ganap na alas-3:00 ngayong hapon nang huling mamataan ang nasabing LPA sa layong 680 km silangan ng Davao City.
Paiigtingin nito ang easterlies na magbibigay ng mga kalat-kalat na pag-ulan sa iba’t ibang bahagi ng bansa.
Sakaling maging tropical storm, tatawagin itong bagyong Aghon.
Ang Eastern Visayas at Caraga ay makakaranas ng maulap na papawirin na may kasamang pag-ulan at pagkulog na maaaring magdulot ng flash floods o landslides.
Habang ang iba pang bahagi ng Mindanao ay makararanas din ng kalat-kalat na pag-ulan.
Habang ang Metro Manila ay magkakaroon din na maulap na papawirin na may kasamang pag-ulan o pagkulog dahil sa epekto ng easterlies na magdudulot ng posibleng flash floods o landslides dahil sa matinding pagkulog.