Ni NOEL ABUEL
Pinuri ni Senador Christopher “Bong” Go ang matagumpay na pagtatapos ng sportsfest na ginanap sa ilang bahagi ng Mindanao.
Ayon kay Go, chairman ng Senate Committee on Sports, umaasa itong magpapatuloy ang pagkahilig ng mga kabataan sa iba’t ibang palaro.
Ang nasabing sportfest ay isinagawa sa Mindanao State University sa Sultan Naga Dimaporo noong Mayo 20 hanggang 21; Maigo noong Mayo 22 hanggang 23; at Iligan City sa Mayo 24 hanggang 25, lahat sa Lanao del Norte sa koordinasyon ng Philippine Sports Commission (PSC) at suporta nina , Senador Sonny Angara, Senador Pia Cayetano, at Go.
Ipinahayag ni Go ang kanyang suporta sa mga hakbanging ito at idiniin ang pagkakahanay nito sa kanyang adbokasiya na isulong ang sports bilang paraan para maiwasan ng mga kabataan ang mga bisyo tulad ng iligal na droga.
“Get into sports and stay away from drugs to keep us healthy and fit,” paalala nito.
“Ang sports ay hindi lamang isang paraan para manatiling fit, ito rin ay mahalaga sa paghubog ng karakter, disiplina, at pakikipagtulungan. Sa pamamagitan ng sports, natututunan natin ang kahalagahan ng teamwork, dedikasyon, at pagharap sa mga hamon ng buhay na may positibong pananaw,” dagdag ni Go.
Inulit ni Go ang kanyang pangako sa pagsuporta sa mga inisyatiba sa palakasan na nakikinabang sa mga student-athletes at nagpapalakas ng mga kabataang may kapangyarihan na higit na makakapag-ambag sa pagbuo ng bansa.
“I am thrilled to see the enthusiasm and dedication of our young athletes in these sportsfests. This is a testament to the positive impact of sports on our youth, steering them away from vices and fostering a healthy, active lifestyle,” giit pa ng senador.
Binigyan-diin din ni Go ang kanyang mga pagsisikap na palakasin ang pag-unlad ng palakasan sa bansa.
Ito ay ang inihain nitong mga panukalang batas kabilang ang Republic Act No. 11470, na nagtatag ng National Academy of Sports (NAS) sa New Clark City, Capas, Tarlac.
Isinasama ng pangungunang institusyong ito ang sekundaryang edukasyon sa isang dalubhasang kurikulum sa palakasan, na nagbibigay ng natatanging plataporma para sa mga mag-aaral na atleta upang maging mahusay sa akademya at atleta.
Bukod dito, inihain at pangunahing itinaguyod ni Go ang Senate Bill No. 2514, ang panukalang Philippine National Games (PNG) Act.
Ang batas na ito ay naglalayong magtatag ng isang komprehensibong balangkas para sa isang national sports program, pagsasama-sama ng mga grassroots sports promotion sa mas malawak na agenda ng national sports development. Ang panukala ay pumasa sa ikatlo at huling pagbasa nito sa Senado noong Mayo 20.
“Napaka-importante po nitong Philippine National Games, para po itong mini-Olympics. Every two years po itong gaganapin, at makikita natin na doon po madidiskubre ito pong mga atleta na nasa malalayong lugar dahil marami rin pong potential athletes doon,” aniya.
“As vice chair of the Senate Committee on Finance, I just want to share that in our budget for 2024, we championed additional budget for the Philippine Sports Commission or PSC kasama na diyan ang budget para sa Philippine National Games at Batang Pinoy,” ayon pa kay Go.
OnlineBalita news 