Alice Guo at 15 iba pa aarestuhin ng Senado: Dating Sec. Harry Roque tinukoy ng Pagcor na nag-lobby sa POGO

Ni NOEL ABUEL

Pinatawan ng contempt of court ng Senate Committee on Women, Children, Family Relations and Gender Equality si suspended Bamban Mayor Alice Guo o Guo Hua Ping at pitong iba pa dahil sa pang-iisnab sa patuloy na imbestigasyon sa Philippine Offshore Gaming Operators (POGO).

Sa mosyong inihain ni Senate Pro-Tempore Jinggoy Estrada at sinegundahan ni Senador Nancy Binay, kinatigan ni Senador Risa Hontiveros, chairman ng komite, iginiit ng mga ito na dapat na arestuhin si Guo dahil sa hindi nito pagdalo sa pagdinig na idinahilan na may dinaranas na trauma at may mental problems.

Ngunit, sinabi ni Hontiveros na hindi maaaring gamitin ni Guo ang sinasabi nitong nakakaranas ng mental health kung kaya’t ipinawalang-bisa ang ipinadalang sulat ng abogado ni Alice Guo.

Maliban kay Guo, kasama rin sa sinampahan ng contemp sina Dennis Cunanan, Nancy Gamo, Wenyi Lin, Seimen Guo, Jian Zhong Guo, Sheila Guo, Wesley Guo, Duanren Wu, at Chona Alejandre.

Ang mga nasabing indibiduwal ay pawang mga tumatayong opisyales ng Lucky South 99 Outsourcing Inc. at Whirlwind Corporation.

Nagpalabas din ng subpoena si Hontiveros laban kina Ronelyn Baterna, Michael Bryce Mascarenas, Stephanie Mascarenas, Jing Gu, Xiang Tan, Rodrigo Banda, Daniel Salcedo Jr., Chona Alejandre, Duanren Wu, Jaimelyn Cruz, Roderick Paul Pujante, Juan Miguel Alpas, Katherine Cassandra Ong, Alberto Rodulfo Dela Cerna, Jonathan Mendoza, para dumalo ang mga ito sa susunod na pagdinig ng komite.

Samantala, ibinulgar ni Pagcor chairman Alejandro Tengco ang pangalan ng dating opisyal na gabinete ng nakalipas na administrasyon na nag-lobby para sa operasyon ng POGO sa bansa.

Ito ay si dating Sec, Harry Roque, ngunit sinabi ni Tengco na hindi naman nagpa-pressure kundi nakikiusap para kay Cassandra Ong para sa operasyon ng POGO.

Samantala, mariin namang itinanggi ni Roque na sangkot ito sa illegal POGO.

“I vehemently deny media reports claiming that Philippine Amusement and Gaming Corporation (PAGCOR) Chairman Alejandro Tengco allegedly said that I represented an illegal Philippine Offshore Gaming Operator (POGO),” sa kalatas nito.

“As clearly stated by PAGCOR Chairman Alejandro Tengco in today’s Senate hearing, I requested a rescheduling of arrears payment of a lessee and principal of my client Whirlwind Corporation. My client is a service provider to Lucky South, then a holder of a valid license from PAGCOR,” dagdag pa nito.