Sen. Estrada sa PNP at NBI: 1-buwan para mahuli si Alice Guo

Ni NOEL ABUEL

Binigyan ng isang buwang palugit ni Senate Pro-Tempore Jinggoy Estrada ang Philippine National Police (PNP) at ng National Bureau of Investigation (NBI) para mahuli si suspended Bamban, Tarlac Mayor Alice Guo.

Ginawa ng senador ang pahayag sa joint hearing ng Senate Committee on Women, Children, Family Relations and Gender Equality at ng Committee on Migrant Workers at Committee on Public Order and Dangerous Drugs, kung saan matagal na aniyang nakalabas ang warrant of arrest laban kay Guo o Guo Huang Ping.

Kasabay nito, nagbabala si Estrada na hindi malayong maapektuhan ang budget ng PNP at ng NBI kung patuloy na mabibigo ang mga itong mahuli si Guo.

“If you cannot arrest her within a month, baka maapektuhan ang budget ninyo, sabi ni Estrada.

Una nang inusisa ni Estrada si Senate Sgt & Arms chief, Ret. Gen. Roberto Ancan kung ano na ang estado ng paghahanap kay Guo.

“Madam chair, your honors, before we conducted the issuance of the serving, the order of arrest, we connected with the Philippine National Police, as well as after which I connected with NBI with regard to the arrest of the eight personalities,” ayon kay Ancan.

Sinabi naman ni Police Colonel John Mark J. Lagare, ang chief of staff ng Criminal Investigation and Detection Group (CIDG) na nagpakalat na ng tracker team para hanapin si Guo.

Sa panig naman ng NBI, sinabi ni Assistant Director Angelito Magno na karamihan ng mga ahente nito ay ginagawa ang lahat para maisilbi ang warrant of arrest laban kay Guo.

“The warrant of arrest had been already cascaded to our regions. As oof now, most of the agents are doing their best to locate and serve the warrant of arrest,” ayon dito.

Inusisa naman ni Estrada ang NBI kung ano ang ginagawa nito sa pagiging aktibo ni Guo sa Facebook.

“Efforts are being done by our cybercrime group, Madam Chair,” sabi ng NBI.

Idinagdag pa ni Magno na nakatanggap ito ng impormasyon na nakita umano si Guo sa Bulacan.

“We were informed by our assets as of prior to the issuance of warrant there are some sightings in Bulacan however when the team went to the possible location of the sightings. As of now, wala naman pong nahuli o nakita,” ayon sa NBI.