Dahil sa naitatalang mga sunog
Ni NOEL ABUEL
Bunsod ng patuloy at dumaraming kaso ng naitatalang sunog sa iba’t ibang bahagi ng bansa ay dapat na gumawa ng aksyon ang pamahalaan.
Ayon kay Deputy Speaker at Cebu 5th District Rep. Vincent Franco “Duke” D. Frasco, nababahala ito sa pagtaas ng bilang ng mga insidente ng sunog sa bansa na umabot na sa halos dalawampu’t limang porsyento (25%) sa unang dalawang buwan ng 2024.
Sa inihain nitong House Resolution No. 1686, iginiit nito sa Bureau of Fire Protection (BFP) at Department of the Interior and Local Government (DILG) na isama sa kanilang FY2025 National Expenditure Program ang pagbili ng mga firefighting helicopters.
“For the past years, fire incidents have become a big problem in the Philippines. Among the most common challenges encountered while responding to such fires especially in densely populated and residential areas are the delayed arrival of firefighters due to severe traffic congestion and their difficulty in accessing the fire-affected and congested sites due to minimal and low upgrade firefighting gears, equipment, and vehicles,” paliwanag ni Frasco.
Naniniwala ang kongresista na isang napaka-epektibong diskarte tulad ng aerial firefighting na lubhang kailangan para sa mas mabilis at mas mahusay na mga operasyon sa pagsugpo sa sunog.
Aniya, dahil ang BFP ay wala pang kapasidad at nilagyan ng mga kinakailangang mapagkukunan para sa mga ito, itinutulak ni Frasco ang pagkuha ng sariling firefighting helicopters ng ahensya upang maisama ang pamamaraang ito sa kanilang mga operasyon nang hindi na kailangang umasa sa ibang sektor tulad ng Philippine Air Force.
Binigyan-diin ni Frasco ang kahalagahan ng pagpakilos ng BFP at upang matiyak ang pagtugon nito sa pamamagitan ng pag-upgrade sa fire protection services sa pamamagitan ng pagbili ng mga bago at modernong kagamitan at sasakyan tulad ng mga firefighting helicopters.
Ito ay alinsunod din sa BFP Modernization Program sa bisa ng Republic Act No. 11589, na naglalayon sa pagpapahusay ng kakayahan ng mga tauhan nito at pagkakaroon ng makabagong state-of-the-art fire prevention, fire supression, fire investigation, at emergency medical and rescue services facilities and equipment.
Sa pamamagitan ng HB 1686, umaasa ang kongresista na higit pang palalawakin ang pagsisikap ng gobyerno sa pagpapahusay at modernisasyon ng BFP upang matupad ang mandato nito na tiyakin ang kaligtasan ng publiko sa pamamagitan ng pag-iwas at pagsugpo sa lahat ng uri ng sunog, na may aktibong suporta ng komunidad.
OnlineBalita news 