Pisong pondo sa 2023 sa Optical Media Board

NI NOEL ABUEL

Nais ni Senador Jinggoy Ejercito Estrada na bigyan ng pisong budget ang Optical Media Board (OMB) sa susunod na taon dahil sa kawalan ng maayos na trabaho nito.

“According to my research, the OMB had no performance whatsoever for the past year. No collection, no apprehension of violators, wala, talagang zero performance,” sabi ni Estrada.

“One year in office, wala talagang ginawa, zero performance. That’s why on Monday, during continuing budget plenary deliberations in the Senate, I will propose for a one peso budget for OMB,” dagdag pa ng mambabatas.

Base sa isinagawang pagdinig noong nakalipas na Oktubre 18 sa panukalang budget na P75.858 milyon para sa OMB sa susunod na taon, kinuwestiyon ni Estrada ang chairman ng ahensya na si Jeremy Marquez dahil sa kawalan umano ng maipagmamalaking performance ng ahensya mula nang maupo ito sa regulatory office na nangangasiwa sa pagbibigay proteksyon at pagbibigay ng intellectual property rights sa digital form.

“During your term, there was zero administrative cases filed against violators of RA 9239 from November 2021 when you took over until about July of this year 2022. In contrast, the OMB was averaging 200 administrative cases filed each month before you took over,” ayon kay Estrada.

Sa pagkukumpara kay Marquez sa mga naunang naupo sa ahensya, sinabi ni Estrada na nakakolekta ang OMB ng P560,000 noong 2018; P1.83 milyon noong 2019; P350,000 noong 2020; at P2.3 milyon noong 2021 sa administrative penalties.

“And during your term, zero collection. Number two, zero seizures of counterfeit and illegal storage devices from November 2021, when you took over, until August of this year. In fact, you only recently ordered the OMB agents to conduct seizure operation against violators of RA 9239 just so you can have something to report for the budget deliberations in both Houses of Congress,” sabi ni Estrada.

Ang halaga ng mga nakumpiska kada taon ng OMB sa pagitan ng 2018 hanggang 2021 ay mula P71.65 milyon hanggang P309.9 milyon at nang si Marquez ang naging chairman, umabot lamang ito sa P100,000.

Sa paliwanag naman ni Marquez, hindi umano nito kailangang magsagawa ng seizure operations dahil hindi na talamak ang pagbebenta ng mga pirated DVD sa bansa tulad ng dati na hindi naman tinanggap ni Estrada.