P1.27B ng DOT mawawala dahil sa tiwaling OTS personnel — solon

NI NOEL ABUEL

Nanganganib na mapunta sa wala ang P1.27 bilyong pondo ng Department of Tourism (DOT) para sa pagpapaganda ng imahe ng Pilipinas dahil sa ginawang kalokohan ng ilang tauhan ng Office for Transport Security (OTS).

Ito ang sinabi ni Deputy Speaker at Batangas Rep. Ralph Recto kung saan dahil sa ginawa ng limang tauhan ng OTS na pagkuha sa P8,000 pera ng isang dayuhan ay nalagay na naman sa kahihiyan ang Ninoy Aquino International Airport (NAIA).

“A few erring OTS employees have dealt the nation a black eye. Na-tag na nga ang NAIA as one of the world’s worst airport, lalo pang pinalala ng insidenteng ito. That viral footage has inflicted a reputational damage which could cancel gains from DOT’s P1.27 billion branding offensive this year,” sabi ni Recto.

Ayon sa kongresista, may budget ang DOT na P346 milyon ngayong taon na lumalabas na gumagasta ang mga taxpayers ng halos P1 milyon kada araw para sa pampasuweldo at operations ng Office for Transport Security.

“Napupunta rin sa OTS ang parte ng kinokolektang NAIA terminal fee, na P300 mula sa domestic passengers at P750 naman kung sasakay ng international flights. These mandatory fees are paid by passengers on the guarantee that their belongings are protected, not pilfered by employees of the very same agency to which they have made the payment,” sabi nito.

Giit pa ni Recto, dahil sa pag-iinteres ng tiwaling OTS personnel sa maliit na halaga ay kapalit naman nito ang milyun-milyong halaga ang mawawala sa ekonomiya ng bansa.

“Ilang libong piso ang ninakaw sa isang pasahero, pero milyun-milyon ang posibleng mawala sa ating ekonomiya. It would, however, take more than the prosecution of erring personnel to erase the unfair impression that the X-ray machines of our biggest airport are manned by pickpockets,” aniya pa.

Suhestiyon pa ni Recto, hindi na dapat pang maulit ang nasabing masamang insidente sa NAIA sa pamamagitan ng paglalagay ng  closed-circuit television (CCTV).

“Our airport and transportation officials should roll out new programs that will assure the whole world that our airport security checks are not holdup points. Kasama na dito ang installation ng mga CCTVs that will plug blind spots and will blanket security checkpoints under constant and complete monitoring to deter the repeat of the much assailed theft,” aniya pa.