NI NERIO AGUAS
Iniulat ni Bureau of Immigration (BI) Commissioner Norman Tansingco na naging matagumpay ang pagsisimula ng pagpapatupad ng eTravel platform system sa bansa.
Ayon kay Tansingco, mahigit sa 32,000 dayuhan at mga Filipino ang nakapagparehistro sa nasabing bagong sistema habang mahigit din sa 14,000 Filipino na umalis sa bansa ang nakapagparehistro.
Nabatid na noong Disyembre ng nakalipas na taon nang unang ilunsad ang eTravel platform sa arrival area at pinalawig na sakupin ang mga umaalis na pasahero.
At Abril 15 nang ipatupad ang eTravel, isang single data collection platform para sa mga dumarating at umaalis na pasahero para sa paglulunsad ng integrated border control, health surveillance, at economic data analysis.
Ang sistema ay inisyatiba ng sub-technical working group ng inter-agency task force na pamumunuan ng BI at sa pakikipagtulungan ng Department of Information and Communications Technology (DICT), ng Department of Tourism (DOT), Bureau of Quarantine (BOQ), Bureau of Customs (BOC), Department of Health (DOH), Department of Transportation (DOTr), Department of Justice (DOJ) at ng National Privacy Commission (NPC).
Ayon naman kay TWG head Dennis Javier isinagawa ang virtual orientation and question-and-answer session noong nakalipas na Biyernes sa Airline Operators Council (AOC) na layon na alamin ang mga katanungan ng mga ito sa implementasyon ng eTravel platform system.
“So far, the implementation remains very smooth, with no noted glitches or issues,” sabi ni Javier.
“Modernization of the bureau is really one of the priorities of the BI,” said Tansingco. “This is but the first step in many technological improvements in immigration,” dagdag ni Tansingco na nagsabing ang naturang sistema ay ginagamit na rin sa ibang bansa para sa mga arrival at departure data.
OnlineBalita news 