Ni NOEL ABUEL
Ginisa ni Senador Idol Raffy Tulfo ang mga opisyal ng National Electrification Administration (NEA) matapos nitong panghimasukan ang pamamahala sa Benguet Electric Cooperative (BENECO).
Sinabi ni Tulfo na rerebyuhin nito ang NEA Memorandum No. 2017-035, na ginagamit ng NEA para depensahan ang diumano’y maanomalyang pagtatalaga nito kay Maria Paz Rafael bilang General Manager (GM) ng BENECO.
“As far as I’m concerned, walang problema ang BENECO – mababa ang kanilang singil, maganda ang performance at walang brownouts sa areas na sakop nila. Ngayon, bakit pinalitan ng NEA ang general manager elected by their board of directors? ‘Yan ang tanong ng consumers ng BENECO. Ika nga sa kasabihan, if it ain’t broke, don’t fix it,” ani Tulfo.
“’Yung memorandum order, I have to look into that, I will change that. It has to be changed,” dagdag nito.
Matatandaang inihalal ng board of directors ng BENECO si Melchor Licoben bilang GM matapos na magretiro ang yumaong si Gerardo P. Versoza noong Abril 2020.
Gayunpaman, itinalaga rin ng NEA, na nangangasiwa sa mga electric cooperatives, si Rafael bilang GM ng kooperatiba.
Paulit-ulit na binanggit ni NEA Deputy Administrator for Legal Services Atty. Rossan Rosero-Lee ang Memorandum No. 2017-035 para depensahan ang pagtatalaga kay Rafael.
Nakapaloob sa nasabing memorandum ang mga proseso sa pagpili ng GMs ng mga kooperatiba.
Sinabi ni Tulfo na nababahala ito dahil napakadali para sa NEA na tanggalin at palitan ang isang GM na inihalal na ng board of directors ng isang kooperatiba.
“Dito tayo nagkakaproblema dahil kahit pala nakapili na ang board of directors ng kanilang general manager, pwede pala itong randomly palitan ni NEA. In a way, tinatanggalan ng halaga ang selection process ng isang kooperatiba,” ani Tulfo.
Sa halip na makialam sa mga kooperatiba na may magandang performance, tulad ng BENECO, sinabi ni Tulfo na dapat pagtuunan ng pansin ng NEA na tulungan ang mga kooperatibang may kinakaharap na mga problema.