Ni NOEL ABUEL
Malugod na tinanggap ni House Deputy Minority Leader at Bagong Henerasyon party list Rep. Bernadette Herrera ang suporta ng malalaking grupo ng negosyante sa bansa sa kanyang panukalang batas na naglalayong alisin sa Philippine Ports Authority (PPA) ang regulatory function nito at gawin na lamang korporasyon para sa commercial and development purposes.
Ayon sa kongresista, malaking bagay ang ipinahayag na suporta ng Philippine Chamber of Commerce and Industry (PCCI), Philippine Exporters Confederation Inc. (Philexport), Supply Chain Management Association of the Philippines (SCMAP), at Philippine Liner Shipping Association (PLSA) para maging batas ang inihain nitong House Bill (HB) 1400.
“We appreciate the support of various business groups to our legislative proposal that would address not only the conflict of interest, but more importantly, the competitive neutrality issue hounding the PPA that has led the Philippines to have the highest cargo handling cost in Southeast Asia,” sabi pa ni Herrera.
Ang HB 1400 ay naglalayong repormahin ang pangangasiwa ng mga daungan sa pamamagitan ng paghihiwalay sa mga regulasyon at komersyal na tungkulin ng PPA.
Sa ilalim ng panukalang batas, ang PPA ay gagawing Philippine Ports Corp. (Philports) at ang mga regulatory function nito ay ililipat sa Maritime Industry Authority (MARINA).
Paliwanag pa ni Herrera na ang kanyang panukala ay naglalayong iwasan ang pagsasalungat sa interes na nagmumula sa mga regulatory agencies na nakatalaga sa parehong mga regulasyon at pagpapaunlad o komersyal na mga tungkulin.
“Under no circumstances should a regulatory agency benefit from its own regulation and/or use its own regulatory powers to protect itself from competition at the expense of public interest,” giit pa ni Herrera.
Ikinalungkot din ni Herrera na sa paglipas ng mga taon, ang mga gumagamit ng pantalan kabilang ang mga domestic shipper, exporter, at importer ay nagrereklamo sa mababang antas ng serbisyo, hindi mahusay na operasyon sa pantalan at patuloy na pagtaas ng mga singil sa pantalan.
“They claim that the high cost of transport serves as an efficient barrier to increased trade (both local and foreign) and undermines the country’s competitiveness,” aniya pa.
Ilang negosyante na ang sumang-ayon kay Herrera na ang tanging paraan upang wakasan ang mga problema ng conflict of interest at competitive neutrality sa PPA ay ang “i-decouple” ang mga regulasyon at komersyal na tungkulin nito.
Sa joint statements na inilabas nina PCCI president George Barcelon, Philexport president Sergio Ortiz-Luis Jr., at SCMAP president Pierre Carlo Curay sinisisi ng mga industry stakeholders ang pagtaas ng cargo-handling rates sa PPA, na magsisilbing regulatory body at bilang public port developer and operator.
“The Philippines is said to have the highest cargo handling cost in ASEAN (Association of Southeast Asian Nations), which undermines its global competitiveness,” sabi ng mga negosyante.
Ayon sa mga naunang ulat, sinabi ng pangulo ng PLSA na si Mark Matthew Parco na sinusuportahan ng asosasyon ang pagtanggal ng mga tungkulin at regulasyon ng PPA.
Binanggit ni Parco na ang kasalukuyang setup ng PPA, isang attached agency ng Department of Transportation (DoTr), gumana ito bilang isang “for-profit company” at bilang isang regulator ng industriya.
OnlineBalita news 