Bgy. chairmen kinalampag sa utos ng DILG:  BHW at BNS italaga

NI NOEL ABUEL

Kinalampag ng isang kongresista ang mga punong barangay at konseho na sundin ang mga  tagubilin ng Department of the Interior and Local Government (DILG) hinggil sa reappointment ng mga barangay health workers at barangay nutrition scholars sa kanilang nasasakupan.

Ayon kay Barangay Health and Wellness party list Rep. Angelica Natasha Co, binigyang diin ng DILG na ang mga kasalukuyang naglilingkod na mga BHW at BNS ay dumaan sa pagsasanay na ginastusan ng pamahalaan.

“Layon ng DILG na bigyan-diin na dapat ma-reappoint ang mga BHW at BNS upang patuloy makinabang ang mga barangay sa training at experience ng mga BHW at BNS.

“Dagdag gastos at pabigat sa gobyerno kung hindi mare-reappoint ang mga BHW at BNS at palitan ng mga walang training at experience,” ani Co na vice-chair ng Committee on Health sa Kamara.

“Ipinapanawagan natin ito upang maproteksyunan ang mga BHW at BNS laban sa palakasan system sa mga barangay,” ipinunto ni Co.

“Nananatiling may bisa at pinaiiral ng DILG ang gabay nito sa reappointment ng BHWs at BNS,” sabi pa ng kongresista.