Ni NOEL ABUEL
Pinagtibay ng Mababang Kapulungan ng Kongreso ang resolusyon na nagbibigay ng parangal at pagkilalala ang mga Filipino jiu-jitsu athletes na nanalo ng gintong medalya sa 2022 Jiu-Jitsu World Championship na ginanap sa Abu Dhabi, United Arab Emirates (UAE) mula Oktubre 29 hanggang Nobyembre 8, 2022.
Sa House Resolution No. 575 na inihain nina Speaker Martin G. Romualdez, Majority Leader Manuel Jose “Mannix” M. Dalipe, Minority Leader Marcelino C. Libanan, Senior Deputy Majority Leader Ferdinand Alexander A. Marcos, at Tingog party-list Reps. Yedda Marie K. Romualdez at Jude A. Acidre, nais nitong papurihan sina Kimberly Anne Custodio at Margarita “Meggie” Ochoa na parang nanalo ng gintong medalya.
“Through sheer determination, hard work and perseverance, Filipino Jiu-Jitsu athletes, Kimberly Anne Custodio and Margarita ‘Meggie’ Ochoa successfully emerged as the champions in their respective weight
divisions,” ayon sa HR 575 na pinagsama-sama ang HR Nos. 528, 529, 533, 535, 538, 539, 551, 558, at 549.
Sinabi ng mga mambabatas na ang namumukod-tanging pagganap at mahusay na mga hakbang ng dalawang Filipina jiujiteiros ay magsisilbing inspirasyon para sa mga batang atleta at kababaihan sa isang isport na pinangungunahan ng mga lalaki sa mundo.
“Their success puts the Philippines at the forefront of the fastest-growing martial arts sport, jiu-jitsu competitions,” anila.
Sa contingent na binubuo ng apat na babae at apat na lalaki, sumali ang Pilipinas sa 2022 Jiu-Jitsu World Championship na inorganisa ng Ju-Jitsu International Federation (JJIF) na ginanap sa Zayed Sports City sa Abu Dhabi.
Itinampok sa torneo ang mga nangungunang manlalaro ng jiu-jitsu mula sa iba’t ibang bansa kabilang ang Cambodia, Saudi Arabia, United States, Sweden, Spain, UAE, Israel, Canada, Germany, at Tunisia.
Nakasaad sa resolusyon na sa women’s -45 kg division, si Custodio ng Carpe Diem Brazilian Jiu-Jitsu Philippines at Modern Day Samurai
Jiu-Jitsu Iloilo, ay nasungkit ang pinakamataas na premyo sa pamamagitan ng pag-iskor ng mahigpit na 6-4 na panalo laban sa propesyonal na atleta ng Thailand na si Kacie Pechrada Tan sa final match.
Si Custodio, ang 2004 Miss Iloilo Dinagyang beauty queen na naging “armbar queen,” ay dati nang nagbigay ng parangal sa bansa nang manalo ng silver medal sa 2016 Jiu-Jitsu Federation World Championship na ginanap sa Long Beach, California maliban sa ginto at tansong medalya sa 2017 at 2018 San Diego Spring International Open Jiu-Jitsu Championship at bronze medal sa 2019 Jiu-Jitsu Asian Championship; at isang gintong medalya sa Jiu-Jitsu Grand Prix sa Thailand sa parehong taon.
Habang si Ochoa ng Atos Jiu-Jitsu Philippines, ay naging kampeon at nanguna sa women’s -48 kg division sa pamamagitan ng 2-0 win laban sa Canadian na si Ni Ni Vicky Hoang sa finals.
OnlineBalita news 