NI NOEL ABUEL
Ipinagkaloob ni Department of Information and Communications Technology (DICT) Usec. Anna Mae Yu Lamentillo ng kopya ng kanyang librong “Night Owl” sa National Library of the Philippines (NLP) para ipamahagi sa iba’t ibang pampublikong aklatan sa bansa.
Pormal na tinanggap ni National Library of the Philippines Director Cesar Gilbert Adriano ang ibinigay na libro ni Lamentillo, na dating chairman ng Build, Build, Build committee ng nakalipas na administrasyon.
Isinalaysay ng “Night Owl” ang paglalakbay ng bansa patungo sa pagpapabuti ng buhay at masaganang oportunidad na dulot ng Build, Build, Build, ang napakalaking programa sa imprastraktura ni dating Pangulong Rodrigo Duterte.
Kasama rin dito ang isang kabanata sa digital infrastructure agenda ni Pangulong Ferdinand Marcos Jr. na naka-angkla sa Build Better More thrust.
“Sa pamamahagi ng Night Owl sa ating mga pampublikong aklatan, umaasa kaming maibahagi sa mas maraming Pilipino ang kuwento ng ating pag-unlad bilang isang bansa, partikular kung paano nakatulong ang pagtaas ng pamumuhunan sa mga proyektong pang-imprastraktura sa pagpapalakas ng ekonomiya at pagpapahusay sa buhay ng maraming Pilipino, pangunahin sa pamamagitan ng mas mahusay na pag-access sa mahahalagang serbisyo at pagkakataon para sa kabuhayan, pinahusay na koneksyon, at pinahusay na traffic mobility,” paliwanag ni Lamentillo.
“Nais din naming ibahagi kung paano namin nalampasan ang mga hamon na dumating sa gayong ambisyosong programa, at kung paano nakatulong ang political will at ang matinding pagnanais na ibigay sa mga Pilipino ang nararapat sa kanila na isulong ang buong Build, Build, Build team na matapos ang 29,264 kilometrong mga kalsada, 5,950 tulay, 11,340 estrukturang pangontrol ng pagbaha, 222 evacuation centers, 150,149 silid-aralan, 214 airport projects, at 451 seaport projects sa loob ng limang taon,” dagdag pa nito.
Sinabi ni Lamentillo na umaasa ito na sa pamamagitan ng Night Owl, mas maraming mamamayan ang makauunawa sa kahalagahan ng mga pagpapaunlad ng imprastraktura na ito.
Aniya pa, ang Night Owl ay isang progress report sa Build, Build, Build ng administrasyong Duterte, partikular ang mga nagawa ng Department of Public Works and Highways (DPWH) sa ilalim ni dating Secretary at ngayo’y Senador Mark Villar.
Maliban dito, ito ay isang pasilip sa kung ano ang maaaring abangan ng mga mamamayan sa ilalim ng administrasyong Marcos habang itinataguyod nito ang programa ng pamahalaan na mapabuti ang buhay sa pamamagitan ng imprastraktura, kabilang ang isang malakas na digital infrastructure program na pangungunahan ng DICT sa pamumuno ni Secretary Ivan John Uy.
Ang Night Owl ay ang unang aklat na isinulat ni Lamentillo at sumailalim sa editing ni Manila Bulletin Lifestyle Editor Arnel Patawaran, at inilathala ng Manila Bulletin Publishing Corporation.
OnlineBalita news 