Digitized copies ng mga textbooks, solusyon sa 1:1 student-textbook ratio sa mga pampublikong paaralan – solon

NI NOEL ABUEL

Isinusulong ni Senador Jinggoy Ejercito Estrada na magkaroon ng digital copies ang lahat textbook at reference books sa mga pampublikong paraalan sa elementarya at secondary levels sa pamamagitan ng 1:1 textbook-student ratio. 

 “Kung pipilitin natin na mabigyan ng sapat na bilang ng libro ang bawat mag-aaral sa mga pampublikong paaralan, matatagalan pa ito. Ang pagkakaroon ng digital copies na maa-access nila gamit ang internet ang tanging paraan na nakikita ko upang magutunan ang kanilang pangangailangan,” sabi ni Estrada matapos maghain ng Senate Bill No. 2075.

Sa kanyang SBN 2075 o ang panukalang Philippine Online Library Act, layon nitong magtatag ng Philippine Online Library na magsisilbing repository ng lahat ng digitized copies ng textbooks at reference materials na ginagamit ng mga mag-aaral sa public elementary at secondary levels.

 “Kung ang mga ito ay available na online, makakadagdag ito sa mga kasalukuyang silid-aklatan ng mga paaralan maging ng mga local government units sa buong bansa at makakatulong din sa mga guro at mag-aaral lalo na sa mga gumagamit ngayon ng iba’t ibang paraan ng pag-aaral,” ani Estrada.

Sa ilalim ng SBN 2075 ni Estrada, itatalaga sa Department of Education (DepEd) ang paggawa ng mga digitized copies ng lahat ng textbook at reference books ng mga mag-aaral sa public elementary at secondary levels.

Ang mga ito ay ilalagak sa ipinapanukalang Philippine Online Library na magkatuwang na pamamahalaan ng DepEd at  Department of Information and Communication Technology (DICT).

Aniya, sa pamamagitan ng Philippine Online Library ay mapupunan ang pangangailangan sa libro lalo na sa mga mag-aaral na may internet connectivity.

 “Ang kakulangan ng textbooks sa mga pampublikong paaralan ay patuloy nating tinutugunan at dahil na rin sa dami ng mga mag-aaral, hindi natin maisakatuparan ang ideal na. Bukod sa mapapupunan na ang mga pangangailangan ng mga mag-aaral at guro, ang pagkakaroon ng database ay magiging kapaki-pakinabang sa kasalukuyan at sa mga susunod na henerasyon,” aniya pa.

Para matiyak ang access sa mga ito, maglalagay ng mga computer at laptops ang DepEd sa lahat ng pampublikong primary at secondary schools at ang DICT naman ay aatasan na na maglagay ng mabilis at maasahang internet connection.

Imamandato rin sa panukalang batas ni Estrada ang pag-recycle ng mga computer, laptop atbp ng lahat ng national government agencies, GOCCs at  and government financial institutions.

Ang kanilang mga lumang computers na papalitan nila ng bago, ay ieendorso ng DepEd sa DICT para suriin kung nasa maayos na kundisyon pa rin ang mga ito bago ipamahagi sa mga primary at secondary schools sa buong bansa. Sa ganitong paraan, mababawi ang gastusin sa pabili ng mga computers at ng mga mag-aaral.

Ang DepEd at ang National Library of the Philippines ang mangangalaga sa  digitized copies ng mga textbooks.

Ipinapanukala rin ang paglalaan ng Kongreso ng paunang halaga na P500 milyon pamamahalaan ng DepEd at DICT para maipatupad ang nasabing programa at rara naman sa mga gastusin sa mga susunod na taon, sinabi ni Estrada na dapat isama na ito sa taunang general appropriations act (GAA).