Ni NOEL ABUEL
Iminungkahi ng ilang kongresista ang pagbibigay ng 20 porsiyentong diskwento sa mga indigent public utility vehicle (PUV) drivers sa pagbabayad ng mga bayarin at iba pang kinakailangan sa pagkuha ng professional driver’s license.
Sa inihaing House Bill (HB) 8070 nina Davao City 1st District Rep. Paolo, Benguet Rep. Eric Yap at ACT-CIS party list Rep. Edvic Yap, ang diskuwento sa bayarin ay sakop ang examination fees, certificates, clearances at enrollment sa mga accredited driving schools.
Bukod sa pagpapatupad ng PUV Modernization Program, sinabi ni Duterte na ang maraming kinakailangan na ipinataw ng Land Transportation Office (LTO) sa pag-a-apply para sa isang professional license ay magdaragdag sa mga problema sa gastos ng mga PUV drivers lalo na ang mga nabubuhay sa kahirapan.
Sa ilalim ng LTO Memorandum Circular 2021-2284, ang pag-a-apply para sa isang professional driver’s license ng isang aplikante ay hindi bababa sa 18 taong gulang, at ang non-professional na may hawak ng lisensya sa pagmamaneho nang hindi bababa sa isang taon, at makakapasa sa pagsusulit at praktikal na practical driving test.
Dapat ding magsumite ang aplikante ng medical certificate, makakuha ng clearance mula sa National Bureau of Investigation (NBI) o Philippine National Police (PNP) at kumpletuhin ang hindi bababa sa walong oras na practical driving lessons mula sa alinmang driving schools na kinikilala ng LTO o ng Technical Education and Skills Development Authority (TESDA).
“While the intention of the memorandum is to promote road safety and proper motorist behavior, such requirements would add to the burden of the PUV drivers who are now even tasked to buy modernized and climate-friendly vehicles” sa ilalim ng PUV Modernization Program, ayon sa mga mambabatas.
Sa datos ng Land Transportation Franchising and Regulatory Board (LTFRB), ipinunto nito na nasa 430,000 PUV drivers ang maaapektuhan ng mga bagong rekisitos na itinakda ng LTO sa pagkuha ng professional driver’s license.
Sa pamamagitan ng HB 8070, iminungkahi ni Duterte at ng kanyang mga kapwa may-akda na ang mga indigent PUV drivers na nag-a-apply para sa professional driver’s license ay mabigyan ng 20 porsiyentong diskwento sa pagbabayad ng mga sumusunod: 1) certified true copy ng birth certificate mula sa Philippine Statistics Authority (PSA); 2) sertipiko ng medikal mula sa isang klinika o manggagamot na kinikilala ng LTO; 3) NBI clearance; 4) PNP clearance; 5) enrollment fees para sa theoretical at practical driving courses na ibinigay ng LTO- at TESDA-accredited driving schools; 6) bayad sa pagsusulit; at 7) iba pang mga dokumento at bayad na bigay ng gobyerno na kinakailangan ng LTO.
Anila, kung wala ang diskwento, ang kabuuang halaga ng mga kinakailangang bayaran na nasa pagitan ng P4,000 hanggang P7,000.
Ang mga mahihirap na PUV driver-applicants ay makakatanggap din ng fixed daily allowance para sa mga gastusin na gagawin nila sa pag-commute papunta at mula sa kanilang napiling driving schools gaya ng itinatadhana sa panukala.
“The LTO shall reduce the requirement that Professional Driver’s License applicants should be holders of valid Non-Professional Driver’s License for one (1) year before application down to three (3) months for indigent PUV drivers,” ayon sa panukala.
Sinumang public officers o employees na tatanggi na magkaloob ng benepisyo o diskuwento sa ilalim ng panukala ay pagmumultahin ng P5,000 hanggang P20,000.
OnlineBalita news 