Ni NERIO AGUAS
Bumagsak na sa kamay ng mga tauhan ng Bureau of Immigration (BI) ang isang Sudanese na sinasabing sangkot sa human organ trafficking.
Kinilala ni BI Intelligence Division chief, Fortunato Manahan Jr. ang nasabing dayuhan na si Badreldin Elzaki Ibrahim El Habbib, 44-anyos, sa Makati City.
Inaresto si El Habbib sa bisa ng warrant of deportation na inilabas ni BI Commissioner Norman Tansingco, base sa Summary Deportation Order na inilabas noong 2013 para sa ikadarakip nito.
Nabatid na nakatanggap noong 2009 ang BI ng hiling mula sa pamahalaan ng Kingdom of Saudi Arabia (KSA), para madakip si El Habbib dahil sa pagkakasangkot sa organ trafficking na ang mga biktima ay pasyente sa KSA.
Sinasabing modus nito na mag-recruit ng mga Saudi nationals na nangangailangan ng kidney transplant na magtungo sa Pilipinas, ngunit nauwi sa panloloko sa kanyang mga biktima.
Setyembre 2009 nang unang maaresto si El Habbib subalit nagawa nitong makapagpiyansa hanggang sa magtago at magtungo sa Pilipinas.
“His presence in the country poses as a threat to Filipinos. Hence he has been arrested, and will be deported for violating immigration laws,” sabi ni Tansingco.
OnlineBalita news 